Basar på bedehuset
Spente og
forventningsfulle sat me der på første benk. Auga var fulle av gevinstane me
såg opphengt på vegger og plassert på bord. Leistar og vottar genserar og
dukar, hekleteppe og fruktkorger, heimebaka blautkake, og så dokka i seng med rikeleg av klede. Det
var mykje å ynskje seg, og å vente på.
Men først skulle det vera tale, og i
bedehuset var den lang, med oppmoding både til frelste og ufrelste. Deretter var det oftast lysbilete, seinare
film frå misjonsmarka, med halvpåkledde
menn og kvinner som hadde teke imot Jesus og vorte frelst, ungar som
gjekk på skule, folk som vart døypt og framandarta fuglar og dyr. Kjekt det og, men vi venta og vreid oss..
Endeleg
skulle basaren ta til. I mitt område var
det ikkje mat, så vi vart ikkje heft med det, og dei sveitte kronene vart
fordelt på årekjøp. 25 øre for åra i mine første år, seinare gjekk det opp til
både 50 øre og ei krone. Årene var smidd av tre, og hadde påskrivne nummer, ofte med kopiblyant for at tala skulle vere synlege lenge, så vidt eg hugsar
10 tal på kvar åre. Etter avslutta
omgang vart dei samla inn, og selde på nytt. Det var ei ære å få selje årar, og
å få trekkje var og stas, nesten som å vinne.
Så vann dei då, gamle Oline vann
det fine babysettet, og han Ove
på fem år vann leistar store som eit vondt år.
Lått og
morosame kommentarar vart det, medan det snigla seg fram til kveldens
høgdepunkt : Trekking av bøkene. Der var dei finaste gevinstane, broderte
kaffidukar, strikkesett, hekla dukar,
fruktkorga og ikkje minst dokka med klede. Bøkene hadde vore på rundgang i
heimane, og nokre betrudde born hadde tråla bygda for å selje lodd på desse vinstane. Om du
hadde mist sjansen, eller hadde meir pengar å bruke, var det høve til å kjøpe fleire
lodd før trekkinga.
Alle sat
rolege og andelause, og venta i spaning på det store augeblikket. Dei ungane som var mest frampå fekk trekkje, og så vart det
nye eigarar til genserar og huver,
broderte juledukar, og ei stor og velfyllt fruktkorg.
Den store stunda kom: No skulle dokka
trekkjast. Ho vart sett fram i all sin herlegdom, men blondekjole og strikka labbar, og med velutstyrt
garderobe med bukser, skjørt og
genserar. Vi flokka oss rundt, og held
pusten medan nummeret var ropt opp, og den ansvarlege for boka leita seg fram
til namnet på den heldige. Ofte var det menn i langt framskreden alder som
vann, i alle fall hugsar eg det slik, og me ungane kunne ikkje skjøna kva dei skulle med den vinsten. At dei hadde barn og barneborn som kunne få
han, fall oss aldri inn. Me svelgde vonbrotet, og var med på avslutningsongen om å møtes hist
ved floden, eller din rikssak Jesus vere skal, alt etter kva basaren var til
inntekt for. Vi hadde jo opplevd mykje,
kor som var, og basaren var ofte snakkis på skulen dagen etterpå.
Kommentarer
Legg inn en kommentar